Sajak Sunda ( Kertas )

Kertas

                                                          Kénging Aditia Gunawan

Pilakadar nilepan kertas jadi parahu

Masrahkeun angkleungna kana kamalir cai

Kana usum nu dideres cacarakan

Kana sawal nu mulangkeun ka sarakan

Pilakadar nilepan kertas jadi kapal

Masrahkeun apungna kana getas jangjang

Kana hiuk angin nu haroshos

Kana palintang pamayang

Pilakadar nilepan kertas jadi lain nanaon

Ngalakaykeun pirang-pirang kotrétan lawas

Katineung

Atawa urang teundeun

Panglawung urang kana paroman hujan poyan

Nu baseuh, haneut tur caang

Laju kuwung-kuwung ngalingkung

Mukakeun jalan

Atawa urang pasrahkeun

Gurat leungeun urang kana guguritan

Nu dianggit ti bentik langit

Sapadalisan-sapadalisan pangumbaraan

Atawa hatamkeun

Tadarus tineung kapipir gawir panungtungan

Matak lewang titinggalan

Kamelang kumelandang dina haté nu gundawang

Kainggis pras-pris jeroning jamparing girimis

Balabuh

Panjang sagara lir benang hideung nu dipentangkeun

Bulan ririyegan diwelah rayung-rayung pangpung

Ngigelan riak-riak cai nu halimpu

Ti jauhna, pangjugjugan mirupa guha

Dirungkup mangréwu cicika

Paeunteung-eunteung jeung sakeprut béntang na langit peuting

Manéhna laju ngélébétkeun layar bodas mangsa lawas

Nulad lambak nu ngadadak motah

Ngajugjug hiji basisir pigeusaneun sadrah .